Victor Manuel, Lisardo Lombardía y el Clú de Guisanderes van recibir el so nomamientu’l 4 de payares.
LA SIDRA.- El Muséu de la Sidre de Nava va acoyer la ceremonia de nomamientu de lo nuevos confaderes d’honor nel IV Gran Capítulu de la Bona Confradería de los Siceratores dende la so fundación en 2013.
Victor Manuel va ser ún d’ellos. El popular cantante mierense foi escoyíu pol so costante espardimientu d’Asturies pel mundiu, asina como posa so defensa de la sidre nos sos cantares. En pallabres de Ricardo del Ríu, secretariu de la Confradería, “un productu grande como la sidre precisa grandes embaxadores”.
Lisardo Lombardía, direutor del Festival Intercélticu de Lorient, esporta non yá la música, sinón tola cultura asturiana a Francia, amás de ser ún de el fundadores de Belenos, colleutivu dedicáu a espublizar los estudios etnográficos asturianos.
Finalmente, el Clú de Guisanderes d’Asturies, presidíu por Amada Álvarez y formáu por 40 cocineres, caltién la cultura tradicional asturiana nos fogones, pa lo cual utilicen la sidre como un ingrediente principal.
La ceremonia entamará a les 16:30 nel salón d’actos del Muséu de la Sidre, siguía d’un desfile cola Banda de Gaites Lakadarma poles cais de Nava y la visita a los llagares Zapatero y Viuda de Corsino.
Los nuevos confraderes van xunir a los nomaos en 2015: l’actor Pepe Ruiz; la xerente de Sidra Mayador, Consuelo Busto; el creador del decálogu del escanciador, Constantino Ovín; l’historiador Luis Benito; y l’autor del blogue Cider Guerrilla, Eduardo Vázquez.
