Desplicar lo que ye’l Sidracrucis ye comu querer pone-y portielles a la mar. Hai que vivilo p’atalantalo. La procesión más sentía de la Selmana Santa asturiana yá ta de nueu equí.
LA SIDRA.- La duodécima edición de la procesión más sentía y más sidrera de la Selmana Santa entama’l vienres 3 d’abril a les 12 del meudíi y fasta les 10 de la nuechi, los esforciaos del Sidracrucis van de chigre en chigre y de llagar en llagar, cola devoción propia de los amantes de la sidre. Un pocu a pie, otro andando y cuandu ye preciso n’autocar, porque lo primero qu’hai que curiar ye la seguranza.
Al Sidracrucis hai que dir polo menos una vegada na vida, porque ye la única forma d’atalantar la so filosofía. Si decimos que se bebe más d’una caxa sidre por presona pue paecer muncho; si desplicamos que ye a los llargo de 10 hores, con paraínes, forrando curioso, con pinchos en ca chigre, una fabaona xabaz pa xintar, una espicha de remate, cantares, daqué baille y munches rises, la cosa yá va teniendo más sentíu…
