Son estes fiestes un momentu idóniu non solo pa deseyar felicidá a tolos nuesos llectores y amigos, sinon tamién pa encamentar que s’aprofiten les mesmes pa sacar el másimu rendimientu de l’amplia ufierta sidrera qu’agora mesmo podemos esfrutar.

 

Dende la sidre natural a la de nuea espresión, esplumosa, llicor, auguardiente… un mundiu de posibilidaes que permitirá que nes nueses meses la sidre seya la protagonista indiscutible acompangando a los bonos platos. Sidres que comu tales, formen parte de la cultura sidrera asturiana, seyan d’au seyan, y que nel casu de ser del país, n’especial cuandu la mazana tamién lo ye, permíntemos prauticar una economía identitaria más necesaria agora que nunca pal desendolcu del nuesu texíu económicu xuncíu a la mazana y la sidre.

 

Y tamos de nueu de norabona, porque venimos de cellebrar el 75 aniversariu d’un de los nuesos llagares más emblemáticos, Mayador, embaxaor d’Asturies y de la sidre per tol mundiu, y qu’anguañu ta presente colos sos productos nos cindu continentes ensin qu’en dengún intre renunciaren a la so propia identidá. Lo asturiano furrula, equí y fuera, les empreses asturianes tienen sobrada capacidá pa desendolcase y espandise pesia nun recibir tol sofitu que merecen. Eses nun se “desllocalicen”, siguen xenerando bayura y contribuyendo al bientar de la sociedá que les vio ñacer.

 

Y finamos l’añu con un recuentu positivu, entá nun algamemos que’l “Principado” dexe de despreciar a la sidre nos actos oficiales, nin paez tenese avanzao ná na tantes vegaes anunciada declaración de la cultura asturiana de la sidre comu padrimoniu imaterial de la humanidá pola UNESCO, pero yá son munchos los conceyos asturianos que declararen a la sidre comu la so bébora oficial, consiguimos que seya declarada Bien d’Interés Cultural n’Asturies, y perafitemos sinificativamente la nuesa presencia internacional. El SISGA ye un referente obligáu y les nueses sidres siguen trunfando per tol mundiu.

 

Gústamos la sidre, comu bébora y comu identidá, atopámosmos xuníos a ella y sabemos que malpenes tamos escomenzando a acollumbrar les sos posibilidaes de desendolcu a tolos niveles, y por eso ye, comu siempres, un placer deseyar les meyores felicitaciones posibles ¡Que 2015 seya’l más sidreru los años!