El XXXI Concursu de Sidre de Villaviciosa dio’l trunu a Sidra Roza, que recoyerá güei nel ayuntamientu Maliayu’l correspuendiente gallardón.
LA SIDRA.- El Concursu, tuvo perigualáu, con diferencies mínimes ente los primeros clasificaos: 3 centésimes ente’l primeru y el segundu y 2 ente’l segundu y el terceru; colo qu’el xuráu, compuestu por Pablo Costales, Natalia Menéndez, Joaquín Cernuda, Gumersindo Martínez, Guti Rodríguez, Maximino Villarrica, Luis Naredo, Severino Cueva, Loreto García y Joaquín Fernández, tovieron qu’afinar muncho.
En total foron 39 los llagares participantes, de los que s’esbillaron siete pa la final, cellebrada na tardi d’ayeri a puertes abiertes nel Llagar Cortina. Dempués de cuasique dos hores d’actuación del xuráu, proclamóse’l nome del ganaor, que foi recibíu ente aplausos. Sidra Roza ye un llagar de merecíu y xeneral reconocimientu qu’esti añu lleva una perbona progresión, con trunfu tamién nel Festival de la Sidre de Nava.
El premiu, consistente nuna mazana de plata, entregaráse güei nel Ayuntamientu Villaviciosa, al nun tar presente el ganaor, que comu elli mesmu reconoció, nun esperaba esti trunfu dao la competencia y la calidá qu’hai nesti concursu.
Eso sí, el cosmopaletismu nun dexó de tar presente, cola utilización nel diploma acreítativu del trunfu del términu “bodega” en cuentes de “llagar”.
