Nesta postrer edición Alimentaria reinventóse, afondando nel tarrén de la hostelería y la restauración, asina como na ca vuelta mayor tendencia internacional.
La presencia asturiana resultó perdiscreta, con un stand del “Principado” raspiando’l patetismu.
LA SIDRA.- Nesta nueva edición d’Alimentaria, eventu de referencia internacional, llíder nel seutor de l’alimentación y la restauración, nel marcu estatal y nel arcu mediterrániu, que xunta a lo llargo de cuatro díis cerca de 5.000 firmes espositores, participaren únicamente una quincena d’empreses asturianes, si bien tovieron presentes profesionales asturianos d’estremaos ámbetos.
Asina, nel stand del “Principado”, xestionáu por Asturex y de cuya llamentable imaxe damos cunta más alantre, atopábense Trabanco, Cárnicas La Pilarica, Fuensanta, Dem Alimentos y House of Originals Southern Europe. N’estremaos espacios espositivos atopábense Productos Cárnicos Delclós, Adpan, Cafento, Corporación Alimentaria Peñasanta, Fast Eurocafe, La Newyorkina, Vin Bouquet, Masaveu Bodegas, Escanda Asturiana, Del Llar, Eteria Marketing y Comunicación, EM y Grupo El Gaitero.
