Esti negociu, asitiáu en Verdiciu, cumple vente años dende que Yolanda Granda y la so má, Pilar Granda, decidieren conviertir una granxa familiar nuna sidrería restorán que destaca pola so esquisita gastronomía y por escelentes vistes al mar Cantábricu.
LA SIDRA.- Paez que foi ayeri, pero yá pasaren venti años, concretamente’l pasáu 7 de mayu, dende que Yolanda Granda y la so ma, Pilar Granda, decidieren convertir una corte familiar nun negociu d’hostelería que, dos décades dempués, convirtióse en tou un referente de la gastronomía asturiana. Y lo que-yos queda, yá que la saga continúa y el fíu de Yolanda, Illán Vega, yá-yos ta chando un gabitu nel chigre. Asitiáu nel pueblu gozoniegu de Verdiciu, na carretera que va d’Avilés al Cabu Peñes, la finca ta asitiada nun espectacular alrodiu con verde per tolos llaos y con vistes al Cantábricu.
La Fustariega apuesta pola tradición, con unos saborgos y arumes que treslladen a los veceros a la cocina asturiana d’antañu, na que destaca’l so pexe acabante salir de la mar, pudiendo degustase tantu en guisos como a la chapa, en parrillaes o al fornu, sobresaliendo perriba’l restu, el virrei, anque tamién son mui demandaos el xargu, la merluza, la llubina y el meru, asina como los mariscos. Ye nidio que cualisquier elleición ye bona, incluyíes les tapes. Los platos de cuyar tamién faen les delicies de los comensales, dende la clásica fabada fasta’l repollu con amasueles. Ensin escaecemos del so esquisitu arroz con bugre o la so paella de mariscu. P’acompangar, la meyor opción ye una bona sidre, de Peñón, Alonso o Trabanco d’Escoyeta. Los postres, toos caseros, carauterícense pola so xugosidá y frescor, rellumando perriab’l restu la tarta quesu y l’arroz con llechi.
