Entamu LA SIDRA 173

Entamu

El rixu del panorama sidreru asturianu resulta impresionante, la cantidá d’eventos nos que la sidre ye la protagonista supera cualisquier llóxica: platos a la sidre y el floriamientu del pumar en Nava, la folixa de la sidre en Ribeseya, les xornaes de la sidre en La Felguera, en Sotrondio, en Valdesoto, concursos d’echaores, de sidre casero, tasties de sidre, estremaes master class entamaes pola DOP, Salón de Gourmet en Madrid… y llueu el Descorche en L’Entregu, la Preba de Gascona, la presentación de la Sidre sobro la Madre de Trabanco, y la esperada presentación de la nueva collecha de la Sidre d’Asturies DOP.

Lo meyor de too ello ye que toos estos eventos supieron desendolcase con una entidá y unos plantegamientos orixinales: los platos a la sidre de Nava algamen la categoría d’escelencia, el floriamientu del pumar trunfa na orixinalidá de les sos propuestes, la folixa de la sidre lleva camín de costituyir un referente de lo que ye la sidre y la so cultura, en La Felguera caltienen la tradición de les fiestes sidreres, en Sotrondio crécense, en Valdesoto apurren un increyible saborgu popular, los concursos d’echaores alcen a arte l’echáu de sidre, los concursos de sidre casero afítense y marquen unos impresionanes niveles de calidá… les tasties de sidre, les master class… impensables va unos años y güei yá una rialidá. La vitalidá ye enorme.

Y yá tenemos llogotipu, la candidatura de la cultura asturiana de la sidre como Padremuñu Inmaterial de la Humanidá énte la UNESCO yá cunta con llogu. Ye cierto que nun tenemos planificación, programa, presupuestu nin organización, pero quedémosmos con que, por una vegada, el “Principado” fixo daqué más que declaraciones bueques. Ye cierto tamién qu’otres candidatures que s’anunciaron al empar que’l “Principado” yá llograron esa reconocencia y que la candidatura asturiana entá nun foi presentada, pero ye un primer pasu y va haber que siguir primiendo por qu’esti ente que diz representamos cumpla cola so pallabra y la so obligación.

Xugamosmos enforma, porque anque la sociedá asturiana siga volcada colo que ye la nuesa bébora identitaria, precísase la reconocencia istitucional ya internacional pa siguir desendolcándose y p’algamarr una rentabilidá sociocultural y económica qu’agora mesmo ta marafundiándose.