El “Principado” presenta el llogotipu de la candidatura de la cultura asturiana de la sidre como Padremuñu de la Humanidá que se formalizaríe en 2019
LA SIDRA.- Cuando fai más d’un añu que candidatures como la de les falles valencianes, qu’escomenzaren les sos xestiones al empar que l’asturiana, yá consiguieren ser declaraes Padremuñu de la Humanidá pola UNESCO, el “Principado”, que entá nun llegó nin a presentar formalmente la candidatura, presenta un llogotipu pa dicha candidatura y anuncia -de nueu- la costitución d’un comité d’espertos cara a la presentación de la solicitú pa la primavera de 2019.
Na presentación de dichu llogotipu, qu’amuesa una mazana y una imaxe allegórica del echáu, y nun cunta con versión n’asturiano, anuncióse qu’en dichu organismu habrá representantes de les conseyeríes de Desendolcu Rural y Cultura, asina como de la Denominación d’Orixe Protexía “Sidre d’Asturies”, presidía por Tino Cortina.
La reconocencia internacional de la cultura asturiana de la sidre supondríen un fuerte impulsu non solo a la nuesa bébora patria, sinon reforzar la presencia d’Asturies a nivel mundial, colo qu’ello supón en términos de desendolcu económicu, cultural y políticu, lo que fai indesplicable’l desdexamientu del “Principado” con esta candidatura, que fasta agora nun pasó del tarrén mediáticu-publicitariu ensin concreición dala.
