Un típicu postre asturianu pa la Selmana Santa.
LA SIDRA.- N’Asturies llamamos picatostes a lo que n’español se conoz como “torrijas”, de siempres ellaboraes como forma d’aprovechar el pan duro, güei convirtiéronse nun deliciosu postre d’Antroxu y Selmana Santa.
Nesta receta, vamos da-yos un nuevu toque asturianu ellaborándoles con almíbare de sidre.
Ingredientes:
– una barra pan de cuartu del díi anterior
– 300 ml. de sidre natural
– una caña de canela una piel de naranxa
– 7 cuyaraes de zucre
– 250 ml. de llechi
– 2 güevos batíos
– aceite d’oliva virxe
Ellaboración:
Ponse’l llechi a calecer cola piel de naranxa y la caña de canela. Cuando ruempa a ferver, retírase y déxase tapao demientres diez minutos.
Córtase’l pan en rebanaes y remuéyase nel llechi una vegada colao. Pásase ca rebanada per güevu batíu y túrriense n’aceite abondo fasta que tean doraes.
Nun cazu pónse calecer la sidre col zucre. Cuando amenorgue a la metá, asitiamos los picatostes nella y dempués de cinco minutos, estremamos del fueu.
Sirvimos los picatostes nuna fonte y l’almíbare nuna xarra pa que caún sírvase al so gustu.
