La postrer charra de Xixón de Sidre tuvo llugar na Sidrería Río Astur y trató sobro les races de pumar de sidre.
LA SIDRA.- La incorporación de 54 nueves races de mazana de sidre validaes pa la ellaboración de sidre DOP, de les más de 2.000 races de mazana de sidre asturianes esistentes, supón un importante avance na normalización de la DOP, insuficiente pa munchos, que nun comparten qu’unes races de mazana asturiana seyan almitíes y otres non, pero que dende llueu aída a superar daqué les carencies esistentes coles 22 races almitíes con anterioridá.
La charra trató de la estratexa DOP na incluxón de races, l’interés agronómicu y teunolóxicu de les mesmes, y los retos y meyores de la rentabilidá de la pañada de mazanes, y na mesma participaron Daniel Ruíz, Xerente DOP y moderaor charra, Jorge Campoastur, Xerente Campoastur, José Antonio Norniella, Pomólogu, Mª José Antón, en representación Serida, Carlos y Pelayo del Río, Guía Chigrín, Matías Rubio, en representación de la Conseyería de Desendolcu rural y Recursos naturales, Raquel Mendaña, Direutora del programa ‘Noteqedes sin comerlo ni beberlo’, José Ramón Pérez, ‘Avistu de Viajablog’, Rafael Sirgo, Llagareru casero y fiel seguidor de les charres de chigre.
La cultura asturiana de la sidre, siempres pendiente de que’l “Principado” cumpla la pallabra y presente la candidatura na Unesco, l’estudiu y rexistru del conxuntu de les races de mazana asturiana, tovía por planificar, y el calter milenariu y popular de la nuesa bébora patria centraron en bona midía les intervenciones.
