Na so quinta edición, cellebrada na Sidrería La Montera Picona de Ramón, participaron 45 llagares.
LA SIDRA.- Riestra foi la sidre ganaora de la Meyor Primer Sidre L’Añu, el segundu llugar foi pa Cabueñes y el terceru pa Cabañón. Tamién fueron finalistes La Morena y Orizón -a pré en cuartu llugar-, Arsenio, Piñera, Peñón y L’Allume, que quedaron n’orde de quinta a ochava, respeutivamente.
“Toi percontentu, cola competencia qu’hai anguañu nel mundiu la sidre, esta reconocencia ye importante. Estupendo pa entamar bien l’añu” manifestó Raúl Riestra, ellaboraor de la sidre ganaora qu’amás apuntó a qu’esta bébora, al ser xoven, ye “perafrutiada” amás de faer bon vasu.
El sábadu 17 de marzu llevóse a cabu la V edición del concursu Meyor Prime Sidre L’Añu con 45 llagares iscritos. El certame, entamáu pola revista LA SIDRA y la Fundación Asturies XXI, tuvo llugar na sidrería xixonesa La Montera Picona de Ramón, asitiada na cai Saavedra en Xixón.
La preseleición entamó a les 11:00 hores y nella escoyóse la sidre finalista. Nun principiu diben ser namás cinco les escoyíes, pero cuatro quedaron a pré na puntuación, polo que pasaren nueve a la final. Darréu, a les 17 hores, escomenzó la tastia final cola sidre preseleicionao. Sidre Riestra algamó 78 puntos, Sidre Cabueñes 76 y Sidre Cabañón 72.
L’asistencia a les deliberaciones foi abierta al públicu. A la fin del concursu los asistnetes pudieron prebar la sidre clasificao.
El xuráu tuvo presidíu por Manuel G. Busto, y costituyíu por Armando Loredo, Manuel Castro, Donato Xoaquín Villoria, Eloy Gómez y Ricardo García.
6 thoughts on “Riestra gana la Meyor Primer Sidre L’Añu”
Comments are closed.