Los colleicionistes d’etiquetes de sidre esmolecíos poles falsificaciones
LA SIDRA.- El mundiu del colleicionismu d’etiquetes de sidre ta en shock. Dende hai años, apaecieron diseños que naide nun tien, pero ¿d’ónde salen? Miguel Ángel García –Gelu-, entamaor y primer presidente de SidrAstur, autor del únicu catálogu d’etiquetes esistente y ún de los mayores colleicionistes d’etiquetes del país, tienlo nidio, yá que ye cosciente de que “fainse piqueñes trampes camudando un nome y un númberu, que, en rialidá nun va a dengún llau, pero estropien la sencia del colleicionismu”. Amás, esta triba d’etiquetes víéndense per internet y anque “nun supón ganar muncho dineru, tan poniendo nel mercáu etiquetes falses”.
Gelu, que cunta con unes 2.000 etiquetes de cuasique un centenar de llagares, escomenzó va una década a catalogar la so colleición, indicando xunta ca diseñu un códigu cuyes tres primeres lletres identifiquen al llagar, les dos siguientes la marca y, a lo cabero, apaecen les lletres DO si pertenecen a la sidre de Denominación d’Orixe Protexío. Nun ye complicao consiguir etiquetes de los llagares, yá que “cuando saquen una nueva, contáutase con ellos y enxamás nun tuviemos problemes pa que mos les manden”.
