El proyeutu Wiidra naz fai 10 años nel CTIC (Cientru Teunolóxicu de la Información y la Comunicación), costituyíu a finales del añu 2003 en Xixón, como una organización privada y benefico-docente ensin ánimu de llucru.
LA SIDRA.- De la man de Pablo Priesca, Director Xeneral del cientru tecnolóxicu, y Manuel Rodríguez, téunicu y alministraor de la ueb del cientru, percorrimos les sos istalaciones, les mesmes onde vió la lluz un proyeutu tan orixinal ya innovador como Wiidra.
Wiidra surdió en 2007 como un proyeutu internu esperimental, rializáu fora d’hores de trabayu, más que como productu rial. Acababa de salir al mercáu la consola Nintendo Wii, revolucionando’l mundiu los videoxuegos por mediu de l’aplicación de los sos mandos, y decidieron criar un sistema que conxugara la teunoloxía de la consola col mundiu de la sidre.
Pa ello crióse un prototipu mediante impresión dixital: una botella y un vasu que teníen embebíos los mandos de la Wii y coneutábense de forma inallámbrica con un echaor rial. Según la forma, posición y cantidá echada pol xugador, llograríase’l resultáu final en forma de culín rial. Toa una revolución.
