Representantes de tol seutor sidreru sopelexaron pa LA SIDRA los sos deseyos d’Añu Nuevu pal nuesu productu más emblemáticu.
LA SIDRA.- Llagareros, pumareros, chigreros, echaores, veceros… representantes de los estremaos miembros del seutor sidreru fexeren públicos dende la revista LA SIDRA los sos meyores deseyos pa esti añu, talamente como pue consultase na revista d’esti mes de xineru, LA SIDRA 169.
Como nun podía ser d’otra miente, nós tamién quinximos amestamos a los bonos deseyos pa esti añu, nel que pedimos fervientemente:
- Qu’apare la emigración forciao de la mocedá asturiano, que nos postreros 20 años tien obligao a emigrar a más de 200.000 asturianos na franxa d’edá de mayor productividá y consumu, lo qu’arriendes d’otres considerances como’l dolor que xenera esta sangría humana, supón un amenorgamientu de consumu añal de non menos de 10 millones de llitros de sidre.
- Que s’ellabore un Plan Estructural pal Seutor Sidreru, sofitáu en tres pegollos: pumareros, llagareros y chigres, con planificación a curtiu, mediu y llargu plazu.
- Que los estudios d’Hostelería n’Asturies cunten dientru’l so curriculum cola asinatura de Sumiller de Sidre y la especialidá col mesmu nome.
- Que la Universidá d’Uvieu incluya ente les sos titulaciones la d’Enoloxía, especialmente centrada na sidre, plantegándose’l necesariu lliderazgu internacional nesti campu.
- Que la Xunión Europea apreba una Llexislación Común Europea pa la Sidre que permita que, lo mesmo que’l vinu, cunte con sofitos y sovenciones a los sos productores.
- Que’l “Principado” cumpla colos sos compromisos y obligaciones no que cinca al nuesu país y a la nuesa sidre.
(Visited 2.893.533 times)
