Seyes xefs con Estrella Michelín amuesen lo meyor de la nuesa gastronomía en Madrid Fusión.
LA SIDRA.- Foi ensin dulda l’actividá más destacada sobro gastronomía asturiana en Madrid Fusión. ‘Cocinando nel Parayísu, Productos d’Asturies a doce manes’ cuntó -como s’indica yá nel entítulu- cola participación de seyes xefs con Estrella Michelín.
En pareyes amosaron lo meyor de la nuesa gastronomía utilizando los productos que da esta tierra y que tantu se promocionaron nel cume culinariu por escelencia del territoriu español.
Nacho Manzano y Ricardo Sotres cocinaron Gochu Asturcelta. El primeru utillizó la parte nomada presa -frita y con un toque de caricote y acompangólo d’un adobu con ocle que llevaba pimienta verde, zusmiu de llima y xenxibre; amás de castañes asaes, maíz a manera de ñoqui, cogordes, berza rizada, remolacha y un toque yodáu. Tamién tresnó un segundu platu: Gochu Asturcelta con caldu bonitu.
Pela so parte Sotres realizó un Gochucu Asturcelta -utilizó la parte del costellame y desgüesola- con tartar de calamar, ocle y biltos yodaos. Al platu incorporó-y un alliñu llamáu lleche de tigre bien usáu na cocina peruana amás d’una vinagreta ellaborada con vinagre de sidre.
Jaime Uz y José Antonio Campoviejo tresnaron platos con Afuega’l pitu y quesu Taramundi. “Nun podría entender nin la cocina, nin la vida ensin quesos” dixo esti postreru. Preparó Afuega’l pitu -blancu y roxu- con caldu de xata ecolóxica, xelatina de llimón y alcaparres.
Jaime Uz presentó un postre: Esponxosu de quesu de Taramundi con miel, nueces, xeláu de romeru, nieve de remolacha -ente más ingredientes-. Un manxar pa los más llambiones.
Finalmente Isaac Loya y Marcos Morán llevaron a cabu una reinterpretación del Virrei, “el pexe de moda”. Loya confitó’l Virrei y combinólu con esferes d’aguacate, acelga collorada, xenxibre y salicornia; mentes que Morán usó pal so pesxe raigañu de La Capuchina, una mayonesa fecha con güevos a baxa temperatura y ocle.
“N’Asturies esiste una bien bona rellación calidá-preciu. Somos baratos fasta ofiender, nun pasa ná por dicilo, enriba somos variaos… y aprovecho yá que veo equí munchu asturianu: Dexái de falar mal de Asturies!” manifestó Morán arrincando l’aplausu de dellos de los asistentes.
El taller foi presentáu y empuestu pol periodista gastronómicu David Fernández-Prada de Gustatio, y entamáu pola Conseyería de Turismu. El direutor xeneral Julio González Zapico tuvo presente, asina como importantes críticos gastronómicos, representantes de Otea, hosteleros y medios de comunicación.
