Óscar Flórez: “Prestaríame que se creara una categoría hostelera pa chigres y sidreríes qu’echen la sidre y con barra abierta al públicu”
LA SIDRA,- Óscar Flórez, miembru fundaor de l’Asociación de Fomentu de la Sidre Tradicional Asturiana, analiza la evolución de la ellaboración de la sidre casero n’Asturies, un entornu en claru xorrecimientu desque esta asociación empecipiara la tradición de les prebes populares acomuñaes a los concursos y escomenzara a impartir cursos de formación.
¿Cuálos fueron los tos primeros contautos cola sidre?
Anguañu teo 65 años y los mios primeros contautos cola sidre fueron con 18 años. Naquellos momentos axuntábemos un grupu compañeros de trabayu a les 2:30 o 3 de la tarde, a la nuesa hora de salida del trabayu, pa tomar unes botelles de sidre en Xixón, en dalgún de los múnchos chigres qu’entós teníen bona sidre.
Aquellos yeren los verdaderos chigres de prestancia, onde la xente xuntábase na barra a tomar sidre bien echao, acompangada d’una tapina de cualaquier cosa, desgraciadamente chigres de los que yá queden pocos.
Empecipié a interesame pola mayadera nes xuntes que faíamos dellos amigos en Caldones animaos por un conocíu collaciu d’esti barriu de Xixón, moteyáu El Llábana.
Cuando la economía lo permitió escomencé a mayar sidra nuna casina nel conceyu Cabranes y, cómo non, les fines de selmana al atapecer la escapada a Nava o Villaviciosa yera vezu d’obligáu cumplimientu.
¿La sidre casero podría llegar a competir cola comercial?
La realidá ye que la sidre que güei se fai en casa ta ameyorada nun 500% respeutu a la de fai un par de décades. Esto nun quier dicir que pueda competir cola sidre comercial, darréu que son productos a distintos, una ellabórase pal consumu pa en casa en pequenos llagares y la otra pa ser comercializada al públicu, en llagares industriales.
Sí ye verdá que de primeres de la realización de concursos de sidre casero, dellos llagares comerciales esmoleciéronse, por si la intención fuera comercializala, pero anguañu sentímonos bien sofitaos por estos grandes llagares, que na so mayoría son coscientes de que promocionar la sidre pa en casa significa promocionar tola sidre y que quien toma sidre na so casa cuando sal a la cai tómala nos chigres.
