Entamu
Vien payares triando fuerte, col concursu de la Meyor Sidre Casero d’Asturies, la Preba Popular de Parres y un azogosu campeonatu d’echaores, qu’a estes altures yá dio’l trunfu a un Salvador Ondó espectacular que s’impunxo con autoridá nos postreros concursos.
Vien fuerte y va a más conforme avérase la fecha na que la Unesco va valorar definitivamente la candidatura de la cultura asturiana de la sidre pa ser incluyía como padremuñu inmaterial de la humanidá. Con bien bones perspeutives, pero ensin que por ello hebia que cayer en trunfalismos, darréu que fasta la primer selmana d’avientu nun habrá ná definitivo.
Les espeutatives son bones, l’esfuerzu y compromisu personal de los promotores de la candidatura, bien especialmente de Luis Benito García, xunto col sofitu incondicional de la sociedá asturiana consiguieron superar les incapacidaes y el desenfotu istitucional que lleva retrasando inxustificablemente esta candidatura demientres años.
Nun fai falta desplicar la trescendencia d’asemeyada reconocencia internacional pa la nuesa bébora patrio. Tanta, que va obligar a les istituciones a mirar seriamente pola sidre y la so cultura, acullá de les bones pallabres y declaraciones d’intenciones, de tala miente que llograr esta reconocencia va ser importante non solo polo que representa cara al esterior sinón polo que supón pa nós mesmos, pa la nuesa sidre y pa la nuesa autoestima.
N’otru orde de coses destacar que tornen los ‘Xueves de Sidre’ a Xixón, una iniciativa xenial que potencia la sidre DOP, la gastronomía y les sidreríes, y qu’a estes altures estraña que nun se tea repitiendo n’otros conceyos asturianos. Tamién tenemos la entrega premios y naguración de la esposición de les semeyes ganaores del XVI Concursu Internacional de Semeyes LA SIDRA, un certame únicu na so concepción y estilu, qu’apurre una espresión artística orixinal a lo que costitúi la cultura de la sidre.
¿Y qué dicir de los amagüestos? Pos que se multipliquen, que ca vuelta son más numberosos, dinámicos y participativos, y que suponen tamién una espresión más d’esta cultura asturiana de la sidre que –esperamos- la Unesco venga reconocer oficialmente como lo que ye, padremuñu de la humanidá.
Eso sí, siguimos teniendo qu’importar mazana pa los nuesos llagares y nun se ve que’l problema vaiga ameyorar. Incomprensible.
