Entamu
Acabó’l mes de setiembre col 14º Salón Internacional de les Sidres de Gala, dexando’l llistón bien altu.
Demientres cuasique una selmana, Xixón en concretu y Asturies polo xeneral, acoparon l’atención y l’interés del mundiu les sidres de copa” con un eventu únicu nos sos plantegamientos y propuestes, que ta modificando la forma d’entender estos certames y bien especialmente’l conceutu de los premios y distinciones, al protagonizar los propios ellaboraores la decisión final sobro
los mesmos.
Un programa apináu d’actividaes, con conferencies nel Muséu de la Sidre d’Asturies que fueron de bien altu nivel y unánimemente apreciaes polos participantes, qu’atopen nelles los aspeutos teóricos y práuticos que los aíden nel díi ente díi, asina como idegues ya iniciatives orixinales dafechu, motivaos pa llevales a cabu y tener la oportunidá de compartiles colos sos colegues nel SISGA del prósimu añu. L’arriquecimientu y evolución d’esti universu sidreru ye costante.
Asina mesmo, el desendolcu de la Rede Europea de Ciudaes de la Sidre y la Mazana –Cider Cities- de magar de la esperiencia del SISGA, constitúi tou un ésitu en sigo mesmu, consiguiendo yá un importante compromisu per parte de conceyos de República Checa, Francia, Italia, Portugal, España y Asturies.
Pero hai munchu más, y nel momentu d’escribir estes llínies ta escomenzando la XV edición de Xixón de Sidre, una auténtica exhibición sidrera popular, y de contrastada calidá, que recupera’l protagonismu de la nuesa sidre natural y enllena les sidreríes d’amantes de la sidre dimpuestos a esfrutala de la meyor de les maneres.
¿Y qué dicir de la sidre casero? Qu’el mes remata colos Premios Mundo Collada, una auténtica espresión de vitalidá de la cultura sidrera asturiana, con un productu natural y artesanu que recupera y desendolca saborgos y cualidaes qu’en munches ocasiones nun s’atopen nes sidres más industriales.
Per otra parte la mazana yá ta llegando a los llagares y tornamos alcordamos de que producimos menos mazana de la que precisamos, teniendo que recurrir a la so importación… falla la planificación. Nun ye serio.
