El certame tendrá llugar el prósimu domingu 20 d’ochobre na Plaza’l Güevu de Villaviciosa
LA SIDRA.- Entamao pola Asociación de Fomentu de la Sidre Tradiconal Asturiana, cola collaboración del ayuntamientu maliayu, esti domingu 20 d’ochobre escoyeráse la Meyor Sidre Casero d’Asturies, faciéndose entrega de los Premios Mundo Collada, nome del prestixosu enólogu maliayés que destacó pola so defensa de la cultura de la sidre y del sector sidreru.
El certame tendrá llugar de magar les 12 del meudíi na Plaza’l Güevu de Villaviciosa, enartáu dientru los actos comemorativos del Díi Internacional de la Mazana, y nel mesmu participarán los ganaores de los estremaos certames de sidre casero entamaos per conceyos. Concretamente esti añu participarán representantes de Colunga, Gozón, Llanes Mieres, Nava, Onís, Piloña, Ribeseya, Salas, Sariegu, Siero, Villaviciosa y Xixón.
Los conceyos con fasta 50 llagares participando nos concursos tendrán trés llagares representándolos, y ca fración de 20 llagares más dará drechu a un nueu representante. Ello asina, esti añu la previsión ye que participen un mínimu de 50 llagares, siendo Piloña, Siero y Villaviciosa los que cunten con mayor representación.
Les eliminatories escomenzarán el prósimu xueves 17 d’ochobre a les 18 hores na Sidrería El Roxu, y la preba final, con degustaicón de sidre casero, tendrá llugar el domingu 20 d’ochobre a les 12 hores na Plaza’l Güevu, Villaviciosa.
