Entamu
Remató agostu cola mareona sidrera de Xixón, y siguió con un auténticu ábanu de certames de sidre casero, pa concluyir nel 14º Salón Internacional de les Sidres de Gala, qu’esti añu torna superase non solo ameyorando la participación internacional, sinón la mesma programación, con una xornada abierta al públicu que promete ser toa una esperiencia
Ciertamente, lo de la Fiesta de la Sidre de Xixón ye una braera exhibición de cultura asturiana de la sidre que cunta con una participación social entusiasta. Un eventu sidreru de primer orde que, dirixíu principalmente a los xixoneses y asturianos polo xeneral, ta llamáu a tener repercusión internacional.
Puntu aparte merecen los concursos de sidre casero. Trátase d’ún de los fenómenos sociales más interesantes que se tán produciendo nel nuesu país. Surdieron de forma práuticamente bonal, y anque llóxicamente cunten con sofitos municipales -nos más de los casos-, son independientes del poder políticu/clientelar, respondiendo namás a la voluntá popular.
Por si fora poco, trátase d’unos eventos que tán dirixíos a la sociedá asturiana, al siempres infravaloráu mediu rural, a diferencia de les polítiques de masificación turístico qu’entamen eventos p’atrayer visitantes.
Del Salón Internacional de lesSidres de Gala, ¿qué dicir? Que paez imposible cuntar con un eventu internacional d’asemeyaes carauterístiques. Consiguir que participen nelli llagareros de mediu mundiu, de Xapón a América, y de la mayoría de los estaos europeos, ye una auténtica proeza, pa la qu’afortunadamente cunta con sofitu institucional y d’entidaes privaes, pero sobromanera con una rempuesta social que da sentíu a tol eventu.
Too paez dir bárbaro, a la espera de que pueda confirmase aína l’aprobación del proyeutu internacional CIDEREU presentáu pola Fundación Asturies XXI cola collaboración del Conceyu de Xixón, y de que se faiga rialidá la reconocencia pola UNESCO de la cultura asturiana de la sidre como padremuñu inmaterial de la humanidáñ
Del siempres pendiente Plan Estratéxicu de la Mazana y la Sidra, sigue ensin sabese res, va ha,ber que siguir insistiendo.
