El prósimu vienres 27 setiembre’l llagar de Arbesú en Santo Marina (Siero) va acoyer la décima edición de la Espicha solidaria.
LA SIDRA.- Entamada pol Conseyu Regulador DOP Sidre d’Asturies y la Fundación Sandra Ibarra, tien como oxetivu arreyar al sector sidreru, y a la sociedá polo xeneral, por qu’apurran el so granín de sable en daqué tan importante como ye la llucha escontra esta malura.
Esti añu la periodista Marta Reyero foi nomada ‘Embaxadora de la Sidre d’Asturies Solidaria 2024’. Esta reconocencia, de calter añal, sirve pa estremar el so llabor como difusora de la cultura y raigaños asturianos en tol territoriu estatal. D’esta miente, Reyero recueye’l testigu d’otru periodista asturianu, Antonio Lobato, premiáu na última edición.
L’eventu va cuntar cola participación de productores, ellaboradores, hosteleros, según una nutrida representación de les instituciones asturianes. El preciu de la entrada ye de 40 €, incluyida una donación directa de 10 € a proyectos frente al cáncanu.
