Salvador Ondó torna trunfar en Xixón nun concursu mui reñíu

L’orpín, que pali que pali derivó en lluvia y les llargues cuatro hores que duró el Concursu d’Echar Sidre de Xixón nun desanimaron a los cientos d’espectadores que, los más afortunaos paragües en man, siguieron con atención l’actuación de los cerca de 50 echadores qu’ayeri convirtieron una vez más el serviciu de la sidre nuna demostración d’arte, téunica y precisión.

Salvador Ondó tornó ser campión del concursu, perafitándose nesi primer puestu na categoría xeneral nel que lleva cuasi dende l’entamu d’esta edición del Campionatu, con una distancia de 24 puntos respeutu al segundu na xeneral, Wilkin Aquiles y de 86 col terceru, Antonio Sorca.

Sicasí, esti primer puestu en Xixón consiguiólu por una escasísima distancia d’una décima, con un resultáu de 97 puntos del de Tierra Astur frente a los 96,9 colos qu’empataron Reinaldo Belén, de la Sidrería El Portal de Villaviciosa y Wilkin Aquiles, de la Sidrería La Montera Picona de Ramón, quedando terceru ésti y segundu el maliayu por una mayor puntuación na estaya d’estilu.

Foi perdestacable tamién l’actuación d’Isabella Padrón, de la Bodega Anchón, que consiguió un duple reconocimientu, ganando’l premiu llocal ya’l primer puestu na categoría Sub 25, galardón otorgáu pola Revista LA SIDRA p’afalar la participación de mocedá.

La Montera Picona de Ramón caltién el so primer puestu comu sidrería y sosprendió a toos presentando na menos qu’a once participantes, la plantiya completa qu’atiende tres de la barra d’esti chigre xixonés reconocíu pol so compromiso cola cultura sidrera y participando amás al completu la familia propietaria, Alejandra Vanegas, Emilio Rubio ya un xovencísimu Celso Rubio que da continuidá a la tradición familiar.
Saul Prida, coordinador del concursu, recordó al finalizar l’actu d’entrega que depués d’esti día dedicáu a los echaores profesionales, na tardi de güei tendrá llugar l’intentu de batir el record mundial de xente echando sidre al tiempu. La cita ye de magar les 18:30 na Sablera Poniente.

Galería de Semeyes