Entamu
Sigue agostu cola dinámica esperable de fiestes y eventos onde la sidre ye protagonista, o cuantimenos parte indispensable, y nun dexa de sosprender la terrible vitalidá cola que s’espresa la nuesa cultura sidrera y la perimportante rempuesta social que xenera.
Sicasí, y entá dende l’optimismu, tenemos que faer notar cómo nos macro eventos festivos que s’entamen en Asturies, ya inclusive n’otros menores nos que participen conceyos asturianos, la sidre nun apaez per dengún llau. Ye imposible tomar una botella sidre, nel Tsunami el Bombastic o ensin dir acullá, n’eventos gastronómicos entamaos / patrocinaos por conceyos como’l d’Uviéu o Xixón.
Nestos momentos en que tamos pidiendo la reconocencia pola Unesco de la cultura asturiana de la sidre como padremuñu inmaterial de la humanidá… ¿ye posible que nun tea garantizada la presencia de la nuesa bébora patrio en toes y caúna de les espresiones festives y gastronómiques que se realicen en Asturies? ¿Ye posible que s’autoricen festivales onde la nuesa sidre tea prohibío? ¿Ye posible entamar, autorizar, subvencionar, eventos festivos o gastronómicos nos que la nuesa sidre nun tea presente n’igualdá de condiciones que’l restu les bébores?
Dicimos de la sidre, pero otru tantu podríamos dicir al respective de los alimentos asturianos, o la llingua y la cultura asturiana: prohibíos.
Y ye que, como dixo apocayá nes páxines de la nuesa revista’l presidente de la DOP Sidre de Asturies, Victor Ramos, hai que repensar la sidre, y hai que repensala bien; nun creyamos que ta too ganao nin que nun queda más por faer. Hai que da-y una vuelta.
D’otra miente -y siguimos con males noticiesla masificación turístico que carecemos nestos meses ta acelerando’l paulatín desdexamientu de les barres de les sidreríes, y fasta’l mesmu consumu de la sidre si nun ye nuna xinta, y ensin garantizar que te la echen. Les sidreríes ca vegada tienen más de cases de xintes con sidre que puramente de sidreríes.
Eso sí, esti mes quédenmos munches xornaes de sidre casero -un auténticu lluxu- la Fiesta de la Sidre de Xixón ta al cayer y el Salón Internacional de les Sidres de Gala ta ca vuelta más prósimu, y con importantes novedaes.
La sidre sigue bien vivo.
