Graciano García propón la criación de la Selmana de la Sidre’l Duernu d’Asturies
LA SIDRA.- ¿Cómo iguar una situación como l’actual de supercollecha de mazana?
Graciano García, direutor eméritu de la Fundación Princesa d’Asturies, paez tener la solución: aniciar la Selmana de la Sidre’l Duernu d’Asturies. Asi manifestolo antiayeri en redes sociales, un plantegamientu que tuvo una gran acoyida per parte los sos siguiores.
Y ye que la situación que se ta viviendo esti añu col escedente de mazana ye bien esmoleceora: los collecheros nun saben cómo colocar les tonelaes de mazana sobrante, una y bones los llagares nun tienen capacidá pa absorber dicha cantidá, y les istituciones nun paecen ponese d’alcuerdu en guetar una solución al problema.
Mentantu, les mazanes siguen podreciendo nes pumaraes y ésti paez ser lo que motivó al Grupu 5.000, qu’aporta de baldre la idega, a alcontrar una salida que contente a toos.
Pel momentu, esta idega, dirixía a dalgún pueblu o grupu llagareros qu’amuese interés nella, ta teniendo gran acetación en Facebook. “Esti añu hai escesu de mazana. Pos a mayala y nós a esfrutala” o “Una idega estraordinaria, somos una tierra bendita y nun somos coscientes del nuesu potencial” fueron dalgunos de los comentarios recibíos tres la so espublización.
