Esta yera la primer ocasión na que la “Primer Sidre” salía de Xixón, esportando’l so formatu de furrulamientu a otros conceyos y espardiendo folixa y cultura asturiana al so pasu
A lo llargo de los tres díes que duró la Primer Sidre de Cangues sucediéronse los talleres y actividaes, la gaita nun aparó de sonar nin la sidre de correr, tantu na barra comu de los toneles espardios pel Parque Riera, un entornu esceicional pa esfrutar del branu y la sidre.
El vienres valió pa dir caleciendo motores, estrenando toneles y prauticando los primeros tiros a la rana y la cuatriada. Esi díi un de los momentos estelares foi la entrega del reconocimientu a Jose El Polesu pol llabor, personal y familiar, de caltenimientu del padremuñu sidreru cangués. Tamién foi destacable la tastia guiada a cargu d’Avelino Fuertes, presidente de la Federación Asturiana de Sidre Casero -FASCAS-, quien desplicó a un públicu entregáu les carauterístiques, defeutos y virtudes que podemos buscar nuna sidre. El conciertu de Los Gascones completó les actividaes d’esi primer díi.
Seique l’agua -que cayó a bastiaos- entorpeció dellos de los planes del sábadu, la folixa nun paró por ello, siendo destacable la cantidá de xente de fuera d’Asturies que s’averó a La Riera y que colaron convertios, pallabres testuales, “n’enamoraos absolutos d’Asturies, la so xente y la so sidre”. El taller de facer sidre, al que s’apuntaron non solo la reciella, sinón dellos adultos, valió pa repasar dellos aspeutos del procesu d’ellaboración sidrero; el puntu más divertíu de la tardi foron los xuegos tradicionales pa toles edaes, pasaos per agua pero bien prestosos ya’l taller de bailles del país baxo la lluvia.
El caberu díi d’esta Primer Sidre de Cangues cellebróse la degustación de sidre casero, destacando la alta calidá de la sidre fecho na fastera y teniendo qu’agradecer a la Andecha Sidrera de Parres la so collaboración pa que tou saliere perfecho. Los xuegos, tallerinos, música y sidre nun faltaron tampocu, siendo ello que costó dar por finalizau l’eventu.
