Entamu
Imposible escomenzar un añu ensin bonos deseyos y la esperanza de que necesariamente les coses van dir meyor, y el mundiu la sidre nun pue ser una esceición.
Esti nuevu añu preséntasemos enllenu oportunidaes: la meyora de les comunicaciones, les nueves iniciatives como Cider Cities, llogros como la capitalidá gastronómica d’Uviéu y, de xacíu, la sidre nuevo nos llagares, esperando’l momentu oportunu pa salir al mercáu.
Tenemos per delantre la Primera Sidre L’Añu, el Festival de la Sidre de Nava, la Fiesta de la Sidre de Xixón, el Salón de la Sidre d’Asturies, el Salón Internacional de les Sidres de Gala, Gascona, Asturies Sidra Brut, les fiestes de la sidrw en La Felguera, L’Entregu, Llaviana, Navia… los sidrocoles, los múltiples concursos de sidrw casero per tol país, y por supuestu les fiestes, romeríes y ocasiones especiales nes qu’ensin dulda la sidre va convertise en protagonista. Por nun falar de la esperada declaración pola Unesco de la Cultura Asturiana de la Sidre como Padremuñu Inmaterial de la Humanidá.
¿Hai problemes? Hai problemes y oportunidaes. Tolo que ta vivo ta suxeto a cambios y la sidre ta bien vivo y necesariamente va tener que faer frente a los problemes que nun superara y a los nuevos que se presenten, pero tamién hai nueves oportunidaes.
La naguada reconocencia internacional pola Unesco debiera suponer un espectacular desendolcu del sector de la mazana y la sidre, pero si nun se xestiona bien –y enagora nun se conoz denguna planificación específica al respeutu- pue esbardiase una oportunidá inrepetible.
Lo mesmo podemos dicir del turismu. El cambiu climáticu, l’abaratamientu de costos pola perda de poder alquisitivu de los asturianos/es, el despoblamientu y la meyora de les comunicaciones tán facilitando una ca vegada mayor arribación turística, fasta’l puntu de poder falar de masificación turístico, y ser yá una realidá l’indeseable procesu de xentrificación nes nueses ciudaes. Ye un problema, pero tamién tien de ser una oportunidá. Precísase criteriu, planificación, y voluntá político para faer d’ello un factor de xorrecimientu y non un procesu dexenerativu.
Esti va ser un añu d’oportunidaes, ¡sepamos aprovechales!
Pa recibir el PDF de la revista fai falta tar dáu/da d’alta nel whatsapp de LA SIDRA ¡Gratis!
