El so fuerte compromisu cola cultura de la sidre y cola calidá gastronómica son los motivos que xustifiquen esti reconocimientu
El xuráu d’estos premios, que pretenden poner en valor l’esfuerzu y dedicación de persones, empreses y entidaes, tantu públiques como privaes, en favor d’un sector turísticu local más competitivu, responsable y sostenible, escoyeron a Emilio pol so llabor al mandu de la Sidrería la Montera Picona de Ramón, llabor na que se destacó como fiel defensor de la cultura de la sidre y l’escanciáu, siempres en busca de la escelencia gastronómico y dispuesto en tou momentu a participar en toles iniciatives de meyora de la calidá.
Recordemos qu’esta sidrería ye la única de Xixón que pertenez al Club Sidraturismu Asturies, ostentando la distinción Compromisu de Calidá Turística de magar el 2.017 y la marca Sidreríes de Asturies-Calidá Natural, asina comu’l sellu TUR4All. Amás Emilio ye embaxador de Cocina de Paisaxe del Principáu, marca que s’esforcia por asitiar Asturies como destín gastronómicu de referencia.
El so fuerte compromisu cola cultura sidrera refléxase tamién nel esfuerzu puestu por esta sidrería por axuntar el meyor equipu d’echadores posible, con una plantiya qu’anguañu inclúi al dos vegaes Campeón mundial y, dempués de la so recién renovación del títulu, cuatro vegaes Campeón asturianu d’echaores, al escanciador qu’ocupa’l tercer puestu de la clasificación xeneral, a la muyer meyor clasificada y a un de los más destacaos echadores de la categoría Sub-25. Amás, mensualmente entama na so sidrería, en collaboración cola Revista LA SIDRA, talleres d’echar sidre pa siguir espardiendo la nuesa cultura.
Esti ye’l primer añu que s’apurren los Premios Trayectoria Visita Xixón Profesional, galardones que s’estremen en cuatro separtaos: Trayectoria Profesional, Trayectoria Comprometida, Trayectoria Innovadora y Trayectoria Académica.
