Güei entama la Folixa la Sidre, tres xornaes dedicaes a la cultura sidrera asturiana que finará’l domingu cola cellebración del VII Concursu de Sidre Caseru.
LA SIDRA.- Ribeseya tien tastu a sidre de siempres, pero esta fin de selmana muncho más, y ye que l’asociación ‘Entaína Ribeseya’ cellebra la so yá mítica Folixa la Sidre.
L’eventu entama güei 6 d’ochobre, y finará’l domingu col VII Concursu de Sidre Caseru, nel que participarán ná menos que 30 llagares con 41 palos de sidre, quince d’ellos del propiu conceyu y el restu d’Ayer, Colunga, Llanes, Mieres, Nava, Onís, Parres, Siero y Villaviciosa.
La Folixa entamará col pregón del escritor Inaciu Galán y continuará con un taller pa deprender a mayar a neñes y neños, a cargu del Clú Sierense Amigos de la Mazana. Tamién ta previsto que demientres esta primer xornada s’entregue’l Pin de Plata al sociu d’honor d’esti añu, que tovía nun se sabe quien va ser.
El sábadu cellebraráse’l III Concursu Gaiteros Gelu Cuervo, entamáu pola Escuela Municipal de Música, y que cuntará cola participación d’once solistes, de reconocíu prestixu como Celia Valle, Alvaro Cueto, Nel Cortijo o Luis Enrique Sánchez.
Esi mesmu díi, y cola collaboración de la Banda Gaites Ribeseya recuperaráse’l Festival n’Alcordanza de Puru y Hugo nel que participarán les bandes de gaites El Gumial, Noega y Ribeseya, asina como l’Agrupación Folclórica Picos d’Europa.
Yá na nuechi remataráse colos conciertos de Llan de Cubel, La Tarrancha y el Dj Avanti’l Pueblu.
En cuantes al esperáu VII Concursu de Sidre Caseru, la preba popular entamará a les 12 del meudíi, al empar que’l xuráu valorará los 8 palos de sidre esbillaos ente los presentaos, con entrega premios a los trés meyores del conceyu, que sedrán quien representen al conceyu nel Campionatu d’Asturies a cellebrar en Villaviciosa.
Per otru llau, tamién habrá un concursu d’echaores d’ámbetu llocal, nel que s’espera una curiosa participación.
