Güei a les 7 la tardi va tener llugar la naguración de la esposición ‘Sidre’ nel Muséu Etnográficu del Oriente d’Asturies
LA SIDRA.- La esposición que forma parte del programa ‘Asturies Cultura en Rede’ xunce les obres de diecisiete poetes y quince artistes gráficos, de los más destacaos del panorama asturianu.
La esposición, que s’atopa nel Muséu Etnográficu del Oriente d’Asturies, en Porrúa, Llanes, va dir acompangada por distintes actividaes lúdiques y divulgatives rellacionaes cola nuesa bébora pátria que van dir desendolcándose per tol conceyu llaniscu, nuna programación diseñada conxuntamente pol mentáu muséu y la Casa Municipal de Cultura de Llanes.
Na naguración d’esta tardi procederáse a la presentación de la Bona Confradería de los Siceratores d’Asturies, al cargu del so presidente Ricardo del Río, y como complementu a la mesma tastiaránse dellos productos, destacando Sidrut, el vermú ganador nel apocayá cellebráu XIII Salón Internacional de les Sidres de Gala, nun va faltar la sidre d’El Cabañon y los quesos de Porrúa.
