Jaime Álvarez Fernández, hermanu del tamién bicampión Alvaro Álvarez, consigue por segunda vuelta el prestixosu premiu de gaita del Festival Intercélticu de Lorient.
Nel Cortizo, qu’acompangó cola so música’l Sidracrucis y la Primer Sidre l’Añu, quedó pente los finalistes.
Con ventidós años, Jaime Álvarez Fernández tornaba ganar ayeri un dificil Mac Crimmon nel que’l nivel foi peraltu. El madrilanu con raigañu gallegu, Rafael Carracedo, féxose col segundu premiu ya’l tercer puestu foi pal asturianu Diego Lobo.
Esta yera la quinta vegada que Jaime se presentaba al concursu, nel que consiguió la másima puntuación nes tres pieces coles que participó, que tienen de ser necesariamente d’orixe bretón, asturianu y gallegu. El nivel foi peraltu en xeneral.
La delegación de la revista LA SIDRA cellebró la victoria nel chigre del Dupuy de Lome, onde aconceyen los músicos participantes, brindando con sidre… bretona.
Aparte d’elli, el grupu de baille Fitoria recoyó tamién xenerosos aplausos cola so actuación na amuesa de bailles célticos, nuna actuación que cautivó al públicu, faciéndolu llevantase de los asientos y ballar.
Los gaiteros de la Banda Gaites Castrillón desfilaron peles cais de Lorient na mesma tardi d’esti sábadu,y nuevamente na nueche, qu’aconceyó a toles bandes y grupos de baille de los países participantes nel espeutáculu Horizons Celtiques, una impresionante actuación conxuntacon música y balles de toles naciones celtes.
