Cellebraráse’l prósimu 20 d’agostu a les 12:00 hores na Plaza El Güevu
LA SIDRA.- Entamada pola asociación Fomentu de la Sidre Caseru, cola collaboración del conceyu maliayu, nesta decimo sesta edición del concursu de sidre casero de Villaviciosa espérase cuntar cola participación d’ente 80 y 100 llagares del conceyu, magar que l’añu anterior foi de poca mazana, polo que munchos llagares nun fixeron sidre esti añu, y ye qu’hai que recordar que lo tradicional na sidra casero, ye la so ellaboración ca ‘medios años’, aprovechando l’añu de produción manzanera y folgando’l de vecería.
Los participantes na XVI edición del concursu tienen d’apurrir trenta botelles enantes del 16 d’agostu. Habrá 400, 200, 100 y 50 euros de premiu.
La primer eliminatoria de les sidres presentaes va realizase’l xueves 17, a les 18:30 h na plaza d’abastos, onde s’escoyerán les 12 finalistes, que se van valorar el mesmu domingu 20 d’agostu, demientres la degustación popular, que como ye avezo va riquir alquirir un vasu comemorativu a un preciu de 4 euros pa poder tastiar toles sidres presentaes al concursu, darréu que ca llagar apurre dos caxes a tala fin.
Na presentación del concursu, los entamaores destacaron que Villaviciosa ye’l conceyu asturianu onde más sidre casero se fai, con un total de 327 llagares caseros censáu pola organización, siendo Bedriñana la collación que cunta con más llagares.
