La Revista LA SIDRA y la Fundación Asturies XXI impartirán dos conferencies, n’Hiroshima y Tokyo respeutivamente
Una dellegación de la Revista LA SIDRA y de la Fundación Asturies XXI desplazaráse a Xapón pa participar na Tokyo Cider Collection 2023, una de les mayores feries internacionales de sidre, cellebrará la so ochava edición a finales del mes de xunetu.
Los oxetivos son múltiples, per un llau recoyer les actividaes de la feria y l’actualidá sidrera del país, y per otru protagonizando dos conferencies dientru’l programa del eventu nes que se presentará’l XIII Salón Internaciona de les Sidres de Gala, la sidre asturiano y la cultura asturiana de la sidra.
Asina, Anzu Fernández -dellegáu internacional de la Fundación Asturies XXI- impartirá dos conferencies dientru del ciclu formativu d’esti eventu. La primera d’elles tendrá llugar el 24 xunetu n’Hiroshima como parte del seminariu de sidre pa profesionales de la hostelería entamáu pol llagar Kimura. La segunda conferencia, tendrá como escenariu’l rascacielos Tokyo Big Shigt, cuntando col sofitu del llagar Fukiware Cidrerie y la sidrería tokiota Sidrería Eclipse First.
Les conferencies versarán sobro la hestoria de la sidre d’Asturies, les peculiaridaes de la nuesa cultura sidrera, l’actualidá del seutor sidreru y tamién incluirán una masterclass d’echáu de sidre. Too ello averará’l nuesu país al públicu profesional y particular de la capital xaponesa y servirá tamién pa desendolcar futures rellaciones con productores d’Asturies.
Les rellaciones asturianes lleven años afitándose gracies a la cellebración del Salón Internacional de les Sidres de Gala –SISGA- qu’esti añu cellebrará la so 13 edición el postrer fin de selmana de setiembre en Xixón, probablemente cuntando cola presencia de productores xaponeses.
Gracies al llabor d’internacionalización que desendolca’l SISGA, representantes de la organización foron convidaos a participar nesti eventu análogu en Tokyo, de referencia en toa Asia y el mayor de Xapón, nel que se dan cita los meyores productores del país del sol naciente.
Dende Xapón dedicaremos un culín a la vuesa salú!
乾杯!
