Entamu
Alvertíemos yá nel mes pasáu de la progresiva dinamización del mundiu la sidre nestos meses, y agora mesmo, a les puertes del branu, confírmense les meyores perspeutives.
Nun ye namás la cantidá d’eventos que se rialicen y que s’anuncien, sinon de la perimportante rempuesta que tán llogrando. Escomenzando per Gascona, siguiendo poles munches xornaes y fiestes de la sidre, y rematando pola DOP Sidre d’Asturies, que va presentar prósimamente’l so Salón de la Sidre d’Asturies, eventu referencial nel panorama sidreru asturianu.
Amás de too ello, y hai que destacalo, tán escomenzando les degustaciones y concursos de sidre casero, una actividá que camentamos qu’esti añu va dar un importante emburrión, y que ta consiguiendo que muncha xente nuevo tome’l relevu nesti arte desendolcáu a lo llargo los sieglos. Esti va ser un bon añu pa la sidre casero, porque ye añu de collecha, y siendo asina ye más fácil que la xente s’anime a poner de nueu en marcha’l llagar de casa. Paga la pena.
Per otra parte, pasaron les elleiciones asturianes y nun viemos denguna propuesta nin plantegamientu sobro’l seutor de la mazana y la sidre. Paez imposible que dao la so trescendencia económica, social y cultural, la sidre y la mazana pasaren desapercibíes dafechu nestes elleiciones. Ye inconcebible.
Felicitar, eso sí, a la DOP Sidre d’Asturies pola so anunciada campaña ‘Esta etiquetina ye bien grande’, y a la direutora xeneral de Desendolcu Rural y Agroalimentación, Begoña López, que coles sos declaraciones “Con ca botella sidre que se llevanta, llevántase a Asturies”, supo poner en valor la economía identitaria asturiana, la economía que, precisamente nestos intres en qu’el nuesu país ta sometíu a un procesu de desindustrialización ensin precedentes, supón una garantía de sobrovivencia del mediu rural asturianu y un puntu de sofitu pa que la mocedá asturiana nun siga viéndose forciao a emigrar.
Apostar pola sidre, apostar por Asturies. Ensin dulda.
Pa recibir el PDF de la revista fai falta tar dáu/da d’alta nel whatsapp de LA SIDRA
