Carretera Tiñana arriba alcontrámosmos con un establecimientu que xunce n’ún lo meyor d’un llagar qu’apina tres xeneraciones d’hestoria y un restorán ampliu y acoyeor (la cuenta pa espiches y cellebraciones) con una carta llarga y variá, ispirada nos productos y platos tradicionales del país.
Pidimos pa entamar una ración de Sabadiegu de Noreña a la sidre, con patatines, saborgu mui auténticu y cantidá xenerosa.
Pero pa espectacular, el segundu platu, Merluza con gula y llangostinos. La merluza desfaise na boca y la salsia tien el puntu afayaizu pa resaltar -que non esconder- el saborgu del resto los ingredientes.
De postre, Milfueyes de mazana con xeláu d’ablana, una especialidá de la casa que remata perfechamente una xinta pa rellambese, regao, ye nidio, con delles botelles de Sidra Quelo.
