El cursu impartiráse nel Recintu Ferial de Mieres, del 2 de marzu al 20 d’abril, los llunes y los xueves de 17:30 a 20:00. Inscripciones gratuites del 8 al 23 de febreru.
El Conceyu Mieres, al traviés de les conceyalíes d’Emplegu y Cultura, y l’Asociación Llagareros Artesanos del Caudal entamen l’III Cursu d’Echáu de Sidre Contorna del Caudal. Impartíu por Loreto García Gutiérrez, Campiona d’Echaores 2009, embaxaora de la sidre d’Asturies y chigrera na so sidrería El Madreñeru, esta iniciativa permitirá a les presones participantes –un másimu de 17—conocer los secretos y la téunica d’echar bien un culete.
El cursu va desendolcase nel Recintu Ferial los llunes y xueves, de 17.30 a 20 hores y quien participen y rematen el mesmu con siquier el 75% de les hores completaes van recibir un diploma qu’acreíte la so cualificación. L’ésitu d’ediciones anteriores —tantu a nivel de participación, con toles places cubiertes, como a nivel llaboral, una y bones delles persones atoparon emplegu como echaores tres completalu– llevó al Conceyu y a l’Asociación a impulsar esta tercer edición.
Del 8 (10:00h) al 23 de febreru (23:59h) va tar abiertu’l plazu para rializar les inscripciones, que van ser gratuites dafechu. La asignación de plaza va ser confirmada telefónicamente pola organización del cursu, pos les presones desemplegaes van tener preferencia neses asignaciones, que teniendo en cuenta esa preferencia, van ser asignaes per rigorosu orde d’inscripción.
Enllaz direutu al formulariode inscripción: https://forms.office.com/y/MGdHqTxPG5
