Dende la revista LA SIDRA, cola collaboración de la cooperativa campoastur, de la mano de Jorge García, direutor téunicu de produición vexetal y Pablo Menéndez, téunicu en produición vexetal, ellaboremos los distintos pasos a siguir pa toes aquelles presones que quieran faese pumareros de manera profesional. Quiciabes nun seya’l meyor momentu pola situación del mercáu, pero’l futuru al curtiu plazu pue ser esperanzador si los llagares aumenten el so apueste pola mazana asturiana.
De primeres, como apunta Bada, “enantes de llantar hai qu’echar númberos y ver que seya rentable y xenere ingresos nun futuru al curtiu plazu y non solu gastos”. Una vegada tomada la decisión, hai que validar la finca y ver que seya apta pal cultivu de pumares. Nesti sen, partimos de la base de que yá se tien el prau, porque “si tienes que mercalu, yá non lo amortices”. Hai que refugar finques que tean problemes de drenaxe y almacenen muncha agua, tamién aquelles nes que sople enforma aire. Amás, l’altitú ye “bien llimitante, la llende ta a 750 metros percima del nivel de la mar”.
