José Madiedo Victorero nació en 1967 na antigua estación Pomolóxica de Villaviciosa, onde trabayaba’l so pa. Criáu dende piqueñu ente pumares y con catorce años yá sabía fradar y enxertar. El so destín taba escritu y montó’l so propiu viveru de frutales nel que destaquen los pumares de sidre. La so amplia trayeutoria conviértelu nuna voz autorizada pa, dende una crítica constructiva, analizar la situación actual d’un seutor, que vio amenorgada drásticamente el llantíu de mazana asturiana na postrer década.
¿Cómo vio evolucionar el seutor de la mazana a lo llargo de toos estos años?
Metanes de los años 80, cuando la ganadería escomenzó a dir pa tras, llantáronse munchu pumares y hebio un boom. La mazana pagábase bien. Alcuérdome d’una campaña fai más de trenta y cinco años, n’añu de collecha, que se pagó la mazana a 42 pesetes (0,25 euros), inclusive a final d’aquella temporada, como la mazana nun algamaba a enllenar los toneles, llegóse a pagar fasta a 50 pesetes (0,30 euros). Agora págase práuticamente a lo mesmo con tolo que xubió la vida dende entós. D’aquella, l’apueste polos frutales yera bien grande. Alcuérdome de güaje cuando la plaza’l Güevu golía a mazana na dómina de pañada y los paisanos mayores baxaben arguyosos a Villaviciosa, presumiendo de les sos mazanes. Güei cuasique pasen a les escondidielles por que nun los vean.
