Ventiún años llevó a los hermanos Paz y José Luis Ordieres convertir l’antigua propiedá familiar, con un chigre zarráu diba tiempu y un llagar en desusu, nel actual oasis de tranquilidá y bon comer que ye agora El Chamizu
LA SIDRA.- A un pasu de la Sablera Merón, cola so terraza, el comedor y el llagar, agora afechu pa xintes y espiches, El Chamizu ufierta trés espacios independientes, bien estremaos pero igualmente afayaízos nos que se nota que ca detalle ta curiáu.
Anque la so cocina, cientu per cientu casera, ye famosa pola tortiella de pulpu, cunten con una carta variada de la que Paz prefier destacar los pexes, acabante trayer de la mar y que-y gusta preparar a la chapa, calteniendo tol so saborgor.
Echamos tamién una güeyada al menú d’espicha: espectacular, con empanada, tortiella, bollos preñáos y fayeles, tollo caseru, ente otres esquisiteces.
De la sidre encárgase José Luis y ye desixente. Anque se dexa aconseyar, gústa-y dir al llagar y probar la sidre pa escoyer.
Va quince años que trabaya cola sidra de J.R, desque la casualidá fixo que lo conociera nun taller sidreru “gustóme la sidra y gustóme elli, el tratu”.
Échenlo a mano, tanto nel comedor como -cuando’l clima lo permite- na terraza. Nel llagar tienen dos pipes pa espichar la sidre.
La cercanía nel tratu y el ciñu que ponen José Luis y Paz en tolo que faen ye lo que completa y ameyora la esperiencia de visitar El Chamizu, faciéndote sentir como en casa dende’l primer momentu.
Sidrería El Chamizu. Llugar d’Argüerín 8. Villaviciosa T- 985 99 90 35
