Na XXIII Fiesta de la Sidre de Villaviciosa once llagares maliayos repartieron alrodiu de 3.000 llitros de sidre nuna cita especialmente dedicada a Ucrania y a los colleutivos de sofitu social
LA SIDRA..- L’actu entamó col colleutivu d’ucranianos del conceyu echando’l culín d’honor, y la interpretación del himnu d’Asturies pola Banda Gaites de Villaviciosa, cola plaza’l Güevu atarraquitada d’amantes de la sidre que nun quinxeron perder esti importante eventu sidreru nel qu’once llagares del conceyu -Buznego, Castañón, Coro, Cortina, El Gobernador, Frutos Los Gemelos, M. Busto, J. Tomás, M. Vigón y Vallina- repartieron -culín a culín- alrodiu de 3.000 llitros de la meyor sidre.
Había munches ganes dempués de 2 años de parón, y l’ambiente foi estupendu, con Sidre de la meyor calidá nesta cita na que participaron más de 2.000 presones de toles edaes y procedencia y que tuvo un perimortante conteníu social, cuntando cola collaboración de l’asociación de voluntarios ‘El Valle Solidariu’ de Pión y Candanal, que sofita a colleutivos vulnerables y desfavorecíos, que vendieron los vasos de sidre comemorativos del festival, col llogu de la candidatura de la cultura sidrera asturiana a Padremuñu de la Humanidá, y la imaxe de la ilesia prerrománica de San Salvador de Priesca.
La recaldación –a 5 € el vasu sidre comemorativu- foi de 11.300 euros, que foron pa la Cruz Bermeya de Villaviciosa.
Nel trescursu del festival, el Grupu Astur de Colleicionismu Sidreru –Sidrastur- entregó’l gallardón a la etiqueta más guapina, que nesti añu foi pal llagar Sidra Buznego, aprofitando p’agradecer a los llagares la collaboración col grupu, y a reivindicar la rellevancia de les etiquetes de sidre tantu nel sen estéticu comu nel de rexistru de la ‘cultura sidrera en papel’.
Y ye que la Fiesta de la Sidre de Villaviciosa tornó per tolo alto, cumpliendo les meyores espeutatives, y reivindicándose como una cita obligada del branu maliayés y, en xeneral, del mundiu sidreru asturianu.
