Muñiz ganó la preba popular y Trabanco y La Llarada empataron na preba del xuráu
LA SIDRA.- La XXII Preba de Gascona cumplió cola meyor de les espeutatives, con miles d’asistentes que se distribuyeron pela mesma cai Gascona, la Victor Chávarri y l’Alcalde García Oviedo, pa esfrutar de la sidre de 19 llagares cuyos estands atopábense dimpuestos a lo llargo de diches cais. Pa ello l’únicu requisitu yera mercar el vasu que daba drechu a les degustaciones, el pañuelu de la Preba y la papeleta pa votar qué sidre se consideraba la meyor.
En total participaron 19 llagares nesta edición, la primera na que dichu eventu cunta cola reconocencia del sellu d’interés turísticu rexonal, cuntando con una perimportante rempuesta popular, contabilizándose más de 3.000 votaciones del xuráu popular, que dio’l trunfu a Sidra Muñiz. En cuanto al premiu del xuráu, prodúxose un empate ente Sidra Trabanco y Sidra La Llarada, que quedaron a pré fasta en trés ocasiones.
Per otra parte nesta vixésimo segunda edición aprofitóse tamién pa homenaxar a María Lavilla, responsable de comunicación de Gascona demientres 25 años y ánima mater de la Preba, y al Músicu Luis Estrada, siempres venceyáu a Gascona, a la sidre, y a la música asturiana.
