Por namás 7 euros d’entrada podrá tastiase sidre de decenes de llagares y participar nes abondes actividades preparaes pa la ocasión
La PSLA, entamá pola revista LA SIDRA y la Fundación Asturies XXI, nagura la temporada sidrera n’homenaxe a les tradicionales espiches nes que s’abren los toneles y se preba la primer sidre de la collecha, siendo una de les cellebraciones más enraigonaes de la cabera década en Xixón.
Mañana a les 13:00 l’artista multidisciplinar xixonesa Susana Gudín abrirá les puertes de la que ye de xuro la espicha más grande d’Asturies –y poro, del mundiu-. Nesa naguración fadráse entrega del premiu a la Meyor Primer Sidre l’Añu a Sidra Roza, que sedrá’l llagar protagonista d’esti añu tres de ser escoyíu comu’l que meyor sidre nuevo tien por un espertu xuráu. Darréu tendrá llugar l’homenaxe a Esther Peinó “La Peinona”.
A lo llargo‘l día, amás de poder esfrutar de la sidre más nuevo de decenes de llagares, habrá actividades asgaya p’animar la xornada, destacando los xuegos tradicionales, la presencia de la Banda Gaites El Gumial y l’apaición de dellos campiones del Concursu d’Echaores, incluyendo el cuatro vegaes Campión y segundu clasificáu nel Campionatu d’esti añu, Salvador Ondó, que fadrán esibiciones a lo llargo la xornada.
Miles de persones tornarán aconceyase esta Semana Santa nel Muséu del Pueblu d’Asturies alrodiu la bebida tradicional asturiana, gracies a la cellebración de la Primer Sidre l’Añu, un eventu pa tolos públicos y edaes que cuenta ya con gran raigañu na ciudá, nel que cultura, arruelu, tradición, folixa y gastronomía van de la man. Una gran oportunidá p’averase al mundu la sidre y pa esfrutar d’él, polos namás 7 euros que cuesta la entrada y que permiten tastiar tola sidre que se quiera de decenes de llagares. A lo llargo de les cuatro xornaes sucederánse abondes actividaes enmarcaes na tradición asturiana, comu’l X Concursu de Sidre Casero fecho en maera, pal que ya se recueyen botelles, la XI Asturianada y Sidre que rendirá homenaxe a la canción asturiana el vienres 15, abondes actividaes pa la reciella, música y baille’l país, tasties guiaes de sidre, esporte y xuegos tradicionales y muncho más.
