La Banda Gaites ‘El Gumial’ animará cola so música los cuatro díis de la XII Primer Sidre L’Añu
LA SIDRA.- Tátase d’una formación de gaites asturianes y de percusión que s’enfota n’esparder la música y cultura tradicional d’Asturies. Echó a andar nos entamos del añu 2012 nel Conceyu d’Ayer, garrando’l nome d’un conocíu mayáu de la parte cimera del conceyu.
Anguañu, la banda tien una ventena de componentes y caltien un firme compromisu de formación de nueos músicos na so escuela. Ta dirixida dende l’aniciu por Diego Lobo, faciéndose cargu del cuerpu de percusión el maestru Oscar Doural.
El repertoriu del grupu ta fechu principalmente de temes del folclor asturianu (xotes, muñeres, pasudobles…), afondando na recuperación y allugamientu de la tradición musical ayerana. Tamien amesta una minoría de temes que remanecen d’otres rexones del arcu atlánticu.
Dende l’aniciu,la Banda Gaites “El Gumial” tien participao en munchos festivales y eventos dientru la xeografía asturiana, apostando siempre pola collaboración con otres formaciones asemeyaes. Amás apáutase de forma activa en concursos y campeonatos nos que tien algamao dellos resultáos, como el segundu puestu nel XII Certamen Celtibérico de Bandes de Gaites.
La so participación nesta XII Primer Sidre L’Añu ye una garantía tantu de calidá, como de folixa, lo que xuncío a la sidre, y lo afayaízo del Muséu del Pueblu d’Asturies, anuncia unes xornaes pa nun escaecer.
