Tendrá llugar el domingu 17 d’abril dientru les actividaes de la Primer Sidre L’Añu; el xuráu escomenzará a tastiar les botelles presentaes a les 12:30 hores y prevese que’l veredictu emítase dos hores dempués
LA SIDRA.- Un añu más va llevase a cabu’l Concursu de Sidre Caseru Fecho en Maera. Sedrá una de les actividaes que se van realizar dientru de la Primer Sidre L’Añu 2022. Y cellebraráse’l domingu 17 d’abril nel Muséu del Pueblu d’Asturies en Xixón.
El xuráu va tar presidíu, como n’años anteriores, pol especialista en sidre Manuel G. Busto; y tará formáu por presonal cualificáu. Esti añu, como novedá, ca llagar podrá presentar más d’un palu de sidre –d’estremaos toneles de maera- pero namás podrá algamar un premiu –la qu’algame mayor puntuación.
Habrá de presentase a concursu una caxa de sidre, que podrá llevase enantes del 13 d’abril a la oficina de la revista LA SIDRA (Prendes Pando 11 baxo drecha. Xixón) n’horariu de 9:30 a 13:30 h., o bien direutamente a la Primer Sidre L’Añu (Muséu del Pueblu d’Asturies) enantes de les 12:30 del domingu 17.
El certame llevaráse a cabu de la siguiente manera: En primer llugar va rializase una ronda de preseleición na que’l xuráu va escoyer cinco sidres de toles que se presenten, les escoyíes van ser les que pasen a la final. La tastia va ser a ciegues y va cuntase con un echaor espertu.
Dempués d’una posa escomenzará la segunda fase de la preba, que va consistir en que’l xuráu tastiará les sidres finalistes. Nel casu de que nun hebia dengún empate tocantes a los puntos, van emitir el veredictu. Nel casu de que sí hebia empate, tornarán tastiase les sidres que llograren la mesma puntuación pa saber qué llugar ocupa caúna de les participantes.
Comu se siñalare, a les 14:30 aprosimao va informase del veredictu del xuráu y los ellaboradores van recibir los premios, y los 6 primeros un diploma indicando’l puestu nel que quedó la so sidre.
Una vegada daos los premios, los asistentes al eventu podrán prebar la sidre presentao al concursu.
Hai que destacar qu’esti concursu ye únicu na so especialidá. En primer llugar porque ta empobináu a llagareros non profesionales qu’empleguen el sistema tradicional d’ellaboración de sidre en pipa madera. L’oxetivu de la Fundación Asturies XXI al entamar esti concursu foi’l de dar un impulsu al usu d’esti material pa la produición de sidre, una y bones esta triba de depósitos fueron cayendo adulces en desusu pola xeneralización de los que son de fibra de vidriu o d’acieru inosidable.
Per otru llau, tamién hai que siñalar qu’esti certame ye de los pocos esistentes que tien ámbitu asturianu, una y bones la mayoría de los que se cellebren sobro sidre casero, tán llindaos al conceyu nel que se convoquen.
Pa más información: T / Whastsapp 652 594 983 o info@lasidra.as
PRIMER SIDRE L’AÑU / PROGRAMA PSLA/ MEYOR PRIMER SIDRE L’AÑU / SIDRACRUCIS / XII ASTURIANADA Y SIDRE / CONCURSU DE SIDRE CASERO / PROGRAMACIÓN INFANTIL /TASTIES
