El “Principado”, 13 años dempués d’anuncialo, acaba d’apurrir al ministeriu español l’espediente definitivu de la candidatura de la cultura sidrera asturiana como padremuñu inmaterial de la humanidá
LA SIDRA.- Cuando candidatures que s’anunciaron al empar que l’asturiana (2009) yá va años que fueron reconocíes pola Unesco, el “Principado” acaba de dar el primer pasu oficial para tramitar la declaración de la cultura asturiana de la sidra como padremuñu inmaterial de la humanidá.
Va haber qu’esperar a xunetu d’esti añu pa saber si la propuesta entra nel procesu valoración de 2022-2023 o nel siguiente. La decisión va depender del númberu candidatures que s’unvien dende países menos representaos qu’España na llista de padremuñu mundial inmaterial de la Unesco.
La Conseyería de Cultura, Política Llingüística y Turismu vien de formalizar nel Ministeriu de Cultura y Deportes, en Madrid, la entrega del espediente definitivu de la candidatura de la cultura sidrera asturiana pa ser padremuñu mundial inmaterial de la Unesco. La documentación va unviase formalmente al organismu internacional la prósima selmana pa la so valoración.
El direutor xeneral de Cultura y Padremuñu, Pablo León, foi l’encargáu de presentar a la subdireutora xeneral de Xestión y Coordinación de Bienes Culturales del ministeriu, Pilar Barreru, l’espediente técnicu, frutu de más d’ocho años de trámites que s’empecipiaron en 2014 colos preparativos pa la declaración de la cultura sidrera asturiana como bien d’interés cultural inmaterial.
Un grupu de trabayu constituyíu pol Gobiernu d’Asturies, formáu por representantes de la Denominación d’Orixe Protexida (DOP) Sidre d’Asturies, antropólogos, historiadores y estudiosos, revisó y dio forma al espediente téunicu dende payares, cuando’l Conseyu de Padremuñu Históricu Español alcordó que la cultura sidrera asturiana fora la candidatura que representaría a España esti añu.
