Presta que tovía se siga poniendo, cuando se sirve’l menú diariu, la fonte o pota entera pa servise d’ella, nesti casu de pote de berces, de manera que’l comensal pueda comer a fartucar, vezu tradicional nos chigres asturianos agora en pelligru pola insistencia de munchos foriatos de llevar pa la so casa “lo que sobre” o de “compartir el menú pa dos presones”.
En Casa Lin, una de les sidreríes más mítiques y renomaes de tou Avilés, polos once euros que cuesta’l menú pudimos repetir lo que quinximos d’unes berces pímpanes y bien acompangaes, abondoses en pimentón.
De segundu, una bona ración calamares rebozaos, rustidinos y frescos comu recién pescaos, y ensalada misto adobao con vinagre de sidre.
De postre, piña, y pa beber -eso ya fuera del menú- unes botellines de Sidre Foncueva.
Sidrería Casa Lin. Av. los Telares 3 – Avilés T. 985 56 48 27 85
Redactor: Marcos A. Fernández
