Entamu
Acaba un añu difícil nel qu’asistimos a lo que, esperamos, seyan les postreres rabotaes d’un andanciu que se mos fai interminable y pal que s’aplicaron midíes sanitaries, non siempres entendibles, que perxudicaron descomanadamente a la hostelería, y de resultes a tol seutor de la sidre.
Magar too ello vemos cómo se recuperen y reactiven eventos como los Xueves de Sidre con Denominación, Xixón de Sidre, o Asturies Sidre Brut, reflexu d’una paulatina reactivación del seutor, con munches ganes de recuperar el tiempu perdío y dimpuestu a apostar por aquelles iniciatives que-y permitan reponer el so puxu y presencia social.
Per otra parte, esti mes ta siendo especialmente interesante no qu’a distinciones se refier, Pablo Manzano llogró’l Premiu Nacional de Gastronomía, Tierra Astur el tamién Premiu Nacional d’Hostelería, y les sidreríes La Sifonería, Casa Ricardo y La Costana fueron distinguíes col Platu d’Oru. Hai calidá, hai enfotu, y les merecíes reconocencies van llegando adulces.
De destacar tamién el Campionatu Oficial d’Escanciadores que, magar toles dificultaes, remató con ésitu esta edición na que resultó ganador Wilkin Aquiles, a quien aprovechamos pa felicitar, y na que trunfaron tantu los participantes como los entamaores pol so enfotu y compromisu. ¡Bien por ellos!
D’otra miente, sigue la espectación cola candidatura de la cultura asturiana de la sidre a la Unesco. Paez que s’escomienza a ser cosciente de la transcendencia que tien consiguir esa distinción pa que la marca Asturies, y específicamente la sidre d’Asturies, s’entronice a nivel internacional como referencia única. Les repercusiones nel seutor sidreru, hosteleru, turísticu… inclusive social y cultural, son evidentes.
A lo cabero, recordar a tolos amantes de la sidre qu’estes feches son especialmente afayaíces pa que nun falte la sidre nes nueses meses, la natural, les d’espolleta, les de xelu… toes elles, pa cellebrar les fiestes y pa dar entrada a un nuevu añu del qu’esperamos lo meyor.
