L’International Cheese Festival, l’eventu gastronómicu col quesu como protagonista más importante a nivel internacional, púnxose de llargu esti miércoles nel Palaciu d’Esposiciones y Congresos d’Uviéu
LA SIDRA.- Centenares de profesionales del seutor llactoqueseru de tol mundiu escomenzaron a esibir el so productu pa deleite, non solo del xuráu del World Cheese Awards, sinón tamién del restu del públicu asistente.
Nesta primer xornada, la sidre de Asturies con Denominación d’Orixe Protexida atropó tamién los focos mediáticos. El presidente del Conseyu Regulador, Guillermo Guisasola, participó nel brinde inaugural xuntu al presidente del Gobiernu de Asturies, Adrián Barbón; l’alcalde del Conceyu d’Uviéu, Alfredo Canteli; y la direutora del Institutu del Quesu, Luisa Vilegas. Un brinde que se realizó con sidre d’Asturies, maridaxe oficial del eventu. “Ye un arguyu pal Conseyu participar de forma tan activo nel International Cheese Festival. Nun podíemos faltar a una cita gastronómica d’esti calibre, yá que sidra y quesu sabe a besu”, indicó Guisasola.
Primer tastia
Na xornada vespertina, el Conseyu Regulador de la DOP Sidre d’Asturies cellebró la primera de les tasties programaes. Daniel Ruiz, xerente del Conseyu, y Francisco Martínez, propietariu de la bodega Martínez Sopeña Hermanos fueron los encargaos de falar de les bondaes de la sidre natural calistrao y d’Espolleta DOP Sidre d’Asturies, énte cuasique mediu centenar d’asistentes. Al pie de ellos tamién participó Pascual Cabaño, xerente de Rey Silo, quien presentó al públicu la variedá de quesos azules de la so propia marca.
