Desque n’avientu de 2019 la Universidá d’Uviéu y el Conseyu Regulador de la DOP Sidre d’Asturies roblaren l’aniciu de la Cátedra de la Sidre d’Asturies, yá fueron dellos los finxos algamaos tocántenes a investigación, divulgación y formación. Esta mañana, el direutor de la Cátedra, Luis Benito García, fixo balance de les meyores más significatives, nun actu cellebráu na Aula Magna del Edificiu Hestóricu de la Universidá d’Uviéu.
LA SIDRA.- “La Cátedra de la Sidre d’Asturies tien ente los sos oxetivos fomentar la conocencia sobro toes aquelles temátiques rellacionaes col seutor, tanto aquellos campos rellacionaos cola ellaboración y la industria como los que lo tán cola so hestoria y la so cultura. La Cátedra de la Sidre d’Asturies ye un valor importante pal espardimientu de la nuesa cultura”, comentó Luis Benito García.
Ente les actuaciones rializaes, robláronse xunta la Conseyería d’Educación trés unidaes didáutiques nos ciclos d’infantil, primaria y secundaria, centraes na hestoria y la cultura sidrera.Tamién se fixo fincapié na collaboración col Archivu de Fontes Orales pa la Hestoria Social d’Asturies (AFOHSA) cola fin de crear el fondu oral “La Memoria de la Sidre”. Nesti proyeutu prímase la recoyía de testimonios de presones venceyaes al seutor sidreru con una dilatada trayeutoria, asina comu la de representantes d’oficios tradicionales pertenecientes al ramu. En materia d’actuaciones educacionales, patrocinóse’l cursu d’especialista universitariu sobro hestoria y cultura asturiana de la Universidá d’Uviéu, cuntando la Cátedra con una asignatura dedicada a l’alimentación y la sidre n’Asturies.
Otra llínea d’espardimientu foi la edición y publicación de ‘Cuadiernos de la Cátedra de la Sidre’, que’l so oxetivu ye introducir a los alunos na hestoria, la cultura y la dimensión científica de la sidre. Editáronse yá dellos númberos. El postreru d’ellos, ‘-El comte Charres-Philibert de Lasteyrie. Un illustráu francés estudiando la sidre asturiano a entamos del sieglu XIX’, foi presentáu güei por David González. “La sidre d’Asturies lleva degolando fronteres dende va sieglos”, destacó.
Nesti actu tamién tuvieron presentes el presidente del Conseyu Regulador, Guillermo Guisasola; y el direutor del Ária de Tresferencia y Cátedres d’Asturies, Jorge García. “Ye un arguyu pal Conseyu’l desencolcu d’esta Cátedra. Vamos Siguir sofitando’l so llabor”, dixo Guisasola. Pela so parte, Jorge García definió esti proyeutu como un exemplu d’espardimientu de
