Cellebraránse del 22 d’ochobre al 1 de payares y nelles participen 19 establecimientos de la ciudá
LA SIDRA.- Güei tuvo llugar la presentación de les Xornaes de la cocina tradicional a la sidre en Xixón. L’actu tuvo llugar na sala prensa de la Casa Paquet y nella participaron Ángel Lorenzo, presidente de Otea Xixón; y Daniel Martínez Junquera, direutor de Turismu de Xixón. “Estes son unes xornaes bien potentes pero que se perdieren, entós quinxímos recuperales y xuntu col conceyu llevamos cuatro años rializándoles. Tamos abondo contentos, ca edición va xubiendo la participación. Tienen llugar siempres nel cuartu trimestre porque queremos que seya bien intensu, y asina lo tamos consiguiendo. Tamién vamos siguir colos xueves de sidre, sobromanera agora que recuperemos les barres que yeren tan importantes pa la hostelería” dixo Lorenzo y siguió: “estes xornaes aponderen la nuesa tradición más potente. Los platos tán cocinaos con muncho ciñu y percuru. Estimo la implicación de los 19 establecimientos que participen. Con esto fai ciudá, faise Xixón y cola cocina asturiana faemos que Asturies sepa bien, que Xixón sepa bien”.
Na páxina web de Otea https://www.escapadaasturias.com/xornaes-cocina-tradicional-sidra-2021/ pue atopase tola información sobro estes xornaes, según un gastromapa qu’indica los establecimientos y les sos propuestes, que van dende muxones, ensalaes, llámpares, merluza, bacalláu, carrilleres, llagostinos, cogordes, sardines, chipirones… Y tou ello, como ye de suponer, inclúi la sidre como ún de los sos ingredientes, o en determinaos casos, la mazana. Los establecimientos participantes son El Tendido, Café Central, Hotel Arena, Johy Los Manzanos, La Nueva Zamorana, la Terraza de Viesques, Parrilla Antonio, Parrilla Belmonte, Sidrería Canteli, Sidrería Guaniquei, Sidrería Peces de Madera, La Casona de Jovellanos, La Mar de Platos, La Montera Picona de Ramón, La Terraza de Porceyo, Los Caracoles, Pulpería O’Risón, Sidrería El Chisqueru y Sidrería Rubiera.
