Mentes el gobiernu vascu continúa dando sovenciones y sofitu económicu y téunicu a los sos llagareros, el “Principado” entá nun fexo un res non yá polos llagares asturianos, sinon por tol seutor sidreru
LA SIDRA.- La recién aprobación pol Gobiernu Vascu d’aíes por 10 millones d’euros pa tresformar la sidre atrasao en vinagre -demanda que vienen faciendo los llagareros asturianos dende l’entamu del andanciu Covid-19 al “Principado” ensin algamar denguna rempuesta- ta siendo’l desencadenante d’una reaición d’indignación xeneralizada ente los llagareros asturianos que denuncien el desdexamientu del que son oxetu per parte del “Principado”, y la situación d’indefensión na que dexa al conxuntu del seutor sidreru.
Lo cierto ye que, mentes el “Principado” nun apurrió dengún sofitu pal seutor sidreru asturianu, el gobiernu vascu yá va concediendo dos aídes económiques a los sos llagareros, de 50 millones d’euros la primera, y de 10 millones d’euros esta cabera, aparte del soporte téunicu y sovenciones pa la venta del productu –que sovenciona xuncío al turismo rural-, arriendes de les aídes de diputaciones como la de Gipuzkoa y Áraba.
Los llagareros asturianos vienen demandando, aparte d’aídes especifiques pa tol seutor sidreru asturianu, sovenciones direutes pa convertir n’alcol y/o en vinagre l’escedente de sidre acumulao por mor del andanciu Covid-19, dexando llibres toneles y tinos p’acoyer la collecha d’esti añu, que va ser una auténtica collechona. De nun ser asina, los llagareros van tener dificultaes pa garrar tola mazana de los sos veceros, y l’efeutu va ser nefastu pal conxuntu del seutor sidreru.
“Lo pior del ‘Principado’ ye qu’ensiquiera nun retruca a les nueses demandes” afirmen los llagareros, que se punxeron en comunicación con esta revista, y qu’amesten “Esa ye la diferencia ente tener un gobiernu propiu como los vascos, o tener un ‘Principado’ como’l que mos llantaron n’Asturies”
